தீபாவளி விருந்தாக வருமா விடாமுயற்சி அப்டேட்? ஆர்வத்தில் அஜித் ரசிகர்கள்!

தமிழ் திரையுலகின் உச்சநட்சத்திரமாக திகழ்பவர் நடிகர் அஜித்குமார். தற்போது இவர் விடாமுயற்சி படத்தில் நடித்துக் கொண்டிருக்கிறார். இந்த படம் பல சிக்கல்களுக்கு பிறகே தொடங்கப்பட்டது. நீண்ட காத்திருப்புக்கு பிறகு படப்பிடிப்பு தொடங்கிய தருணத்தில், அதன் கலை இயக்குனர் மிலன் காலமானார். இது தமிழ் சினிமாவில் பெரும் சோகத்தை ஏற்படுத்தியது. அஜர்பைஜானில் படக்குழு இருக்கிறது என்பதை தவிர விடாமுயற்சி படத்தின் எந்த தகவலும் இதுவரை வெளியாகவில்லை.

ஆரவாரமில்லா விடாமுயற்சி:

ஆனால், அஜித்தைப் போல கோடிக்கணக்கான ரசிகர்களை கொண்ட ரஜினிகாந்த், கமல்ஹாசன், விஜய் படங்களின் அப்டேட்கள் அடுத்தடுத்த தினங்களில் வந்து கொண்டிருக்கிறது. குறிப்பாக, விடாமுயற்சி படத்தை தயாரிக்கும் லைகா நிறுவனம்தான் ரஜினிகாந்த் நடிக்கும் தலைவர் 170 படத்தை தயாரித்து வருகிறது.

இந்த படத்தின் படப்பிடிப்பு பூஜைகள், படப்பிடிப்பு தள போட்டோக்கள், ரஜினிகாந்த் கெட்டப் என தொடர்ந்து வெளியாகி ரஜினி ரசிகர்களை குஷிப்படுத்தி வருகிறது. மறுபக்கம், கமல்ஹாசன் இந்தியன் 2, எச்.வினோத் படம், மணிரத்னம் படம் என பழைய கமல்ஹாசனாக பரபரப்பாகி வருகிறார். மற்றொரு திசையில் நடிகர் விஜய் லியோ பரபரப்பு அடங்குவதற்குள் வெங்கட்பிரபு பட பணியில் பரப்பாகிவிட்டார்.

அப்டேட் கிடைக்குமா?

ஆனால், இவை எதுவுமே இல்லாமல் படப்பிடிப்பு தொடங்கியது என்பதை தவிர விடாமுயற்சி படத்தைப் பற்றிய எந்த அப்டேட்டும் இதுவரை வெளியாகவில்லை. வழக்கமாக, அஜித் படங்கள் கடந்த சில ஆண்டுகளாகவே இப்படித்தான் இருக்கிறது. ஆனாலும், பல சிக்கல்களுக்கு பிறகு தொடங்கப்பட்ட விடாமுயற்சி தீபாவளி விருந்தாக வெளியாகி தல தீபாவளியாக கொண்டாடப்படும் என்று ரசிகர்கள் எதிர்பார்த்தனர்.

படப்பிடிப்பே தற்போதுதான் தொடங்கப்பட்ட நிலையில், பொங்கலுக்கு விருந்தாக விடாமுயற்சி களமிறங்கும் என்று ரசிகர்கள் நம்புகின்றனர். ஆனாலும், அஜித் ரசிகர்களுக்கு விருந்தளிக்கும் வகையில் தீபாவளிக்கு விடாமுயற்சியின் ஏதாவது அப்டேட் வரும் என்று ரசிகர்கள் நம்பிக்கையுடன் உள்ளனர்.