SK About AJITH: “அஜித்துடன் பைக் ரைடு போக ஆசை” மனம் திறந்த சிவகார்த்திகேயன்

தமிழ் திரையுலகில் குடும்பங்கள் கொண்டாடும் நடிகர்களில் ஒருவராக இருப்பவர் நடிகர் சிவகார்த்திகேயன். நீண்ட காலமாக படப்பிடிப்பிலே இருந்த இவரது அயலான் திரைப்படம் விரைவில் ரிலீசாக உள்ளது. இந்த நிலையில், இதற்கான ப்ரோமோஷன் வேலைகளில் படக்குழு ஈடுபட்டு வருகிறது.

பைக் ரைடு போக ஆசை:

இந்த நிலையில், நடிகர் சிவகார்த்திகேயனிடம் மூத்த நடிகர் சின்னி ஜெயந்த் நேர்காணல் நடத்தினார். அந்த நேர்காணலில் நடிகர் அஜித் பற்றி சிவகார்த்திகேயன் சுவாரஸ்யமான நிகழ்வு ஒன்றை பகிர்ந்து கொண்டார். அதில், நடிகர் அஜித் ஒரு முறை தன்னிடம் சிவா பைக் ரைடு எல்லாம் போவீங்களா? என்று கேட்டதாகவும், அதற்கு சிவகார்த்திகேயன் உங்க அளவுக்கு எல்லாம் இல்ல சார் என்று கூறியதாகவும் கூறியுள்ளார்.

மேலும், அஜித் ஓட்டுவது நாம் பயன்படுத்துவது போன்று சாதாரண இருசக்ர வாகனம் அல்ல என்றும், அதை வாங்கி முறையாக ஓட்டக் கற்றுக்கொண்ட பிறகு அவருடன் பைக் ரைடு செல்ல ஆசையாக உள்ளது என்று சிவகார்த்திகேயன் கூறினார்.

அஜித்தின் இருசக்கர வாகன பயணம்:

நடிகர் அஜித் நடிகராக மட்டுமின்றி பைக் ரேசர், புகைப்பட கலைஞர், சமையற் கலைஞர், ரோபோட்டிக் நிபுணர், துப்பாக்கிச்சுடும் வீரர் என பன்முகம் கொண்டவராக திகழ்கிறார். சமீபகாலமாக அவர் தனது விலையுயர்ந்த பைக் மூலம் நண்பர்களுடன் இரு சக்கர வாகனத்தில் சுற்றுலா செல்வதை வழக்கமாக வைத்துள்ளார்.
அவரது பைக் ரைடு புகைப்படங்கள் அவ்வப்போது சமூக வலைதளங்களில் வெளியாகி இணையத்தில் ட்ரெண்டாகி வருகிறது. விடாமுயற்சி படப்பிடிப்பிற்கு முன்பாக கூட அவர் அஜர்பைஜான் உள்ளிட்ட பல நாடுகளில் பைக் ரைடு மேற்கொண்டார் என்பது குறிப்பிடத்தக்கது.