தொடர்ந்து பெய்யும் மழை! சாலைகளில் தேங்கும் மழைநீர்! சென்னைவாசிகள் கடும் அவதி

வங்கக்கடலில் நிலவி வந்த காற்றழுத்த தாழ்வு பகுதி இன்று காற்றழுத்த தாழ்வு மண்டலமாக வலுப்பெறுகிறது. இதன் காரணமாக தமிழ்நாட்டில் கடந்த சில தினங்களாக தொடர்ந்து கனமழை பெய்து வருகிறது. மாநிலத்தின் தலைநகரான சென்னையில் ஓரிரு தினங்களாக மழை விட்டு, விட்டு பெய்து வந்த நிலையில் நேற்று மாலை முதல் தீவிரமாக பெய்து வருகிறது.

விடுமுறை:

நேற்று மாலை முதல் இரவு வரை மட்டும் சென்னையில் கொட்டித் தீர்த்த கனமழையால் பல பகுதிகளில் சாலைகளில் மழைநீர் வெள்ளம் போல பெருக்கெடுத்து ஓடியது. கடுமையான மழை பெய்து வருவதால் சென்னை, காஞ்சிபுரம், ராணிப்பேட்டை மற்றும் திருவள்ளூர் ஆகிய மாவட்டங்களில் பள்ளிகளுக்கு மட்டும் விடுமுறை அளிக்கப்பட்டுள்ளது. திருவள்ளூரில் கல்லூரிகளுக்கும் விடுமுறை அளிக்கப்பட்டுள்ளது.

சென்னையில் கொளத்தூர், மீனம்பாக்கம், புழல், நுங்கம்பாக்கம், அண்ணாநகர் உள்ளிட்ட பல பகுதிகளில் நேற்று மாலை மட்டும் 10 செ.மீட்டருக்கு மேல் மழை பெய்தது. மழை காரணமாக மாநகராட்சி பணியாளர்கள் 24 மணி நேரமும் கண்காணிப்பு பணியில் ஈடுபட அரசு உத்தரவிட்டுள்ளது. மேலும், சென்னையில் சாலைகளில் தேங்கும் மழைநீர் உடனடியாக அகற்றுவதற்கும் ஏற்பாடுகள் செய்ய அரசு அறிவுறுத்தியுள்ளது.

தொடர்ந்து பெய்யும் மழை:

வங்கக்கடலில் புதிய புயல் உருவாக உள்ளதால் வரும் 3, 4 மற்றும் 5 ஆகிய தேதிகளில் கனமழை பெய்யக்கூடும் என்று வானிலை ஆய்வு மையம் தகவல் தெரிவித்துள்ளது. தற்போது பெய்யும் மழையை காட்டிலும் தீவிரமாக அந்த தேதிகளில் பெய்யும் என்று தமிழ்நாடு வெதர்மேன் பிரதீப்ஜான் தகவல் தெரிவித்துள்ளார்.

கனமழையால் பாதிக்கப்பட்ட இடங்களில் அமைச்சர்கள், எம்.எல்.ஏ.க்கள் உள்ளிட்ட மக்கள் பிரதிநிதிகள் நேரில் சென்று பார்வையிட வேண்டுமென முதலமைச்சர் அறிவுறுத்தியுள்ளார். போக்குவரத்து நெரிசல் ஏற்படுவதை தவிர்க்க, போக்குவரத்து காவலர்கள் தொடர்ந்து கண்காணிப்பு பணியில் ஈடுபடவும் போலீசார் அறிவுறுத்தியுள்ளனர்.

சென்னை மட்டுமின்றி தமிழ்நாடு முழுவதும் மழை பரவலாக பெய்து வருவதால் ஆங்காங்கே கண்காணிப்பு பணியையும், மழைநீர் சாலைகளில் தேங்காத வகையிலும் பராமரிப்பு பணிகளை மேற்கொள்ள அதிகாரிகளுக்கும், பணியாளர்களுக்கும் அரசு உத்தரவிட்டுள்ளது. சென்னையில் பல இடங்களில் மழைநீர் தேங்கிய இடங்களில் வடிந்தாலும், சில இடங்களில் இன்னும் தண்ணீர் தேங்கியுள்ளது. சாலைகளில் தேங்கிய இடங்களில் தண்ணீரை அகற்றும் பணியில் ஊழியர்கள் தீவிரமாக ஈடுபட்டு வருகின்றனர்.