சென்னையில் ஒரே இடத்தில் ரஜினி – கமல் ஷூட்டிங்! நேரில் சந்தித்துக் கொண்ட நண்பர்கள்!

இந்திய திரையுலகத்தின் உச்ச நட்சத்திரங்களாக திகழ்பவர்கள் நடிகர்கள் ரஜினிகாந்த் மற்றும் கமல்ஹாசன். சூப்பர்ஸ்டார் மற்றும் உலக நாயகன் என்று ரசிகர்களால் கொண்டாடப்படும் இவர்கள் இருவரும் கடந்த 40 ஆண்டுகளுக்கு மேலாக தமிழ் திரையுலகின் ஜாம்பவான் நடிகர்களாக உலா வருகின்றனர்.

கமல் – ரஜினி படப்பிடிப்பு:

ஜெயிலர் படத்தின் பிரம்மாண்ட வெற்றிக்கு பிறகு தற்போது நடிகர் ரஜினிகாந்த், ஞானவேல் இயக்கத்தில் பெயரிடப்படாத படத்தில் நடித்து வருகிறார். சமூக நீதியை பின்னணியாக கொண்டதாக இந்த படம் எடுக்கப்பட்டு வருகிறது என்று கூறப்படுகிறது.

அதேசமயம், விக்ரம் படத்தின் வெற்றிக்கு பிறகு கமல்ஹாசன் மீண்டும் தனது திரைப்பயணத்தை ஆக்ஷன் பக்கம் திருப்பியுள்ளார். கடந்த 10 ஆண்டுகளில் கமல்ஹாசன் நடித்த ஆக்ஷன் அதிரடி படங்கள் குறைவாகவே இருந்தது. ஆனால், விக்ரம் தந்த வெற்றிக்கு பிறகு கமல்ஹாசன் தன் ஆக்ஷன் வேட்டையை தொடர திட்டமிட்டு வினோத் இயக்கத்தில் நடித்து வருகிறார். பிரபாஸ் நடிக்கும் ப்ராஜெக்ட் கே படத்தில் முக்கிய கதாபாத்திரத்தில் நடிக்கிறார். மேலும் மணிரத்னம் படத்திலும் நடித்து வருகிறார்.

நண்பர்கள் சந்திப்பு

இந்த நிலையில், கமல்ஹாசன் இந்தியன் 2 படப்பிடிப்பில் மும்முரமாக இருந்து வருகிறார். இந்த நிலையில், இந்தியன் 2 படத்தின் படப்பிடிப்பும், நடிகர் ரஜினிகாந்தின் தலைவர் 170 படத்தின் படப்பிடிப்பும் சென்னை பிரசாத் ஸ்டூடியோவில் நடைபெற்று வருகிறது. பிரம்மாண்ட நடிகர்கள் இருவரின் படப்பிடிப்பும் நீண்ட வருடங்களுக்கு பிறகு ஒரே இடத்தில் நடைபெற்று வருகிறது.

இருவரின் படப்பிடிப்பும் ஒரே இடத்தில் நடைபெற்று வருவதை அறிந்த இருவரும், ஒருவரை ஒருவர் சந்தித்து நலம் விசாரித்துக் கொண்டனர். மிகப்பெரும் ரசிகர்கள் பட்டாளங்களை கொண்ட இருவரும் கடந்த பல ஆண்டுகளாகவே நண்பர்களாக இருக்கின்றனர் என்பது குறிப்பிடத்தக்கது.