‘பில்லா படத்தில் அந்த ஒரு காட்சி’ அஜித்தின் ஆஸ்தான கலை இயக்குனராக மிலன் உருவானது இப்படித்தான்!

தமிழ் திரையுலகிற்கு கடந்த சில வாரங்களாக சோகமான காலம் என்றே சொல்ல வேண்டும். அடுத்தடுத்து பிரபலங்கள் மற்றும் பிரபலங்களின் வாரிசுகள் மரணம் ஏற்பட்டு வருவது ரசிகர்கள் மத்தியில் மிகவும் துயரத்தை ஏற்படுத்தி வருகிறது. இந்த நிலையில், நீண்ட காத்திருப்புக்கு பிறகு விடாமுயற்சி படக்குழு அஜர்பைஜானில் படப்பிடிப்பை தொடங்கியது.

மிலன் மறைவு:

இந்த நிலையில், விடாமுயற்சி படத்தின் கலை இயக்குனர் மிலன் மாரடைப்பால் நேற்று காலமானார். அவரது மரணம் படக்குழுவினர் மட்டுமின்றி ரசிகர்கள் மத்தியிலும் மிகவும் சோகத்தை ஏற்படுத்தியுள்ளது. உயிரிழந்த கலை இயக்குனர் மிலன் நடிகர் அஜித்திற்கு மிகவும் பிடித்தமான கலை இயக்குனர்களில் ஒருவர் ஆவார்.

நடிகர் அஜித்தின் பில்லா, வேதாளம், விவேகம், துணிவு ஆகிய படங்களுக்கு கலை இயக்குனராக மிலன் பணிபுரிந்துள்ளார். குறிப்பாக, மிலன் பில்லா படத்தில் பணியாற்றதை கண்டு அஜித் வியந்து பாராட்டியதை மறைந்த இயக்குனர் மிலனே தன்னுடைய பேட்டியில் கூறியுள்ளார். விவேகம் படத்தின்போது மிலன் அளித்த பேட்டியில், தன்னுடைய பணியை முதன் முதலில் பாராட்டியவர் நடிகர் அஜித் என்றும், குறிப்பாக பில்லா படத்தில் வரும் மை நேம் இஸ் பில்லா பாடலில் வரும் அரங்கை கண்டு அவர் வியந்து 10 முறை தன்னிடம் அது பற்றி பேசியதாகவும் கூறியுள்ளார்.

அஜித்தின் ஆஸ்தான கலை இயக்குனர்:

மிலனின் அபாரமான திறமையை கண்டே அஜித்குமாரின் அடுத்தடுத்த படங்களான வீரம், வேதாளம், விவேகம், துணிவு படங்களில் மிலன் கலை இயக்குனராக பணியாற்றினார். அஜித்தின் மனம் கவர்ந்த மிலன் விடாமுயற்சி படத்தின் கலை இயக்குனராக பணியாற்றி வந்த நிலையில், அவரது மரணம் ஒட்டுமொத்த படக்குழுவையும் சோகத்தில் ஆழ்த்தியுள்ளது.
சிட்டிசன், தமிழன், ரெட், வில்லன் ஆகிய படங்களில் பணியாற்றிய அனுபவத்தில் கலை இயக்குனராக தனது பயணத்தை தொடங்கிய அவருக்கு பில்லா படம் மிகப்பெரிய திருப்புமுனையை ஏற்படுத்தியது.

கலாப காதலன் படம் மூலமாக 2006ம் ஆண்டு கலை இயக்குனராக அறிமுகமானார். ஓரம்போ, வைத்தீஸ்வரன், ஏகன், சொல்ல சொல்ல இனிக்கும், மோதி விளையாடு, வேட்டைக்காரன், சித்து 12, சிக்கு புக்கு, ஜக்குபாய், மை டியர் குட்டிச்சாத்தான், வேலாயுதம், திக் திக், என்றென்றும் புன்னகை, வீரம், இசை, சிகரம் தொடு, ரோமியோ ஜூலியட், சாகசம், வேதாளம், ஆக்சிஜன், போகன், விவேகம், ஜானி, சாமி 2 படங்களுக்கும் கலை இயக்குனராக பணியாற்றியுள்ளார்.