Kollywood: ரசிகர்களுக்கு சர்ப்ரைஸ் தந்த ரஜினி, விஜய், சூர்யா! அடுத்தடுத்து அப்டேட்கள்!

பொங்கல் பண்டிகை தமிழ்நாடு முழுவதும் கோலாகலமாக கொண்டாடி வருகின்றனர். ஒவ்வொரு ஆண்டு பொங்கலும் தமிழ் சினிமாவிற்கு மிக முக்கியத்துவம் வாய்ந்ததாக அமையும். தொடர் விடுமுறை என்பதால் பொதுமக்கள் குடும்பங்களுடன் திரையரங்குக்கு வருவார்கள். நடப்பு பொங்கல் பண்டிகைக்கு அயலான், கேப்டன் மில்லர், மிஷன் என படங்கள் வெளியாகியுள்ளது.

பொங்கல் கொண்டாட்டம்:

இதில் அயலான் மற்ற இரண்டு படங்களை காட்டிலும் அதிக ரசிகர்களை இழுத்து வருகிறது. இந்த நிலையில், இந்த படங்களை காட்டிலும் உச்ச நட்சத்திரங்களின் படங்களின் அப்டேட்களை அடுத்தடுத்து வந்தது ரசிகர்களை மகிழ்ச்சியில் ஆழ்த்தி வருகிறது.

ரஜினி, விஜய் பட அப்டேட்கள்:

சூப்பர்ஸ்டார் ரஜினிகாந்த் நடித்து வரும் வேட்டையன் படத்தின் போஸ்டர் மற்றும் அவர் பாண்டிச்சேரியில் கோயிலில் வேட்டையன் பட கெட்டப்பில் வந்தது இணையத்தில் படு வைரலாகி வருகிறது. அதுமட்டுமின்றி விஜய் நடிக்கும் கோட் படத்தின் ஏற்கனவே இரண்டு லுக்குகள் வெளியாகி ரசிகர்களிடம் கலவையான விமர்சனங்களை பெற்ற நிலையில், நேற்று வெளியான போஸ்டர் எந்த விமர்சனமும் இல்லாமல் ரசிக்கும் வகையில் அமைந்தது. அதிலும் விஜய், பிரசாந்த், பிரபுதேவா, அஜ்மல் ஆகியோர் கையில் துப்பாக்கிகளுடன் நிற்கும் காட்சிகள் மிரட்டலாக வந்துள்ளது.

சர்ப்ரைஸ் தந்த சூர்யா:

இது மட்டுமின்றி கடந்த இரண்டு வருடங்களாக எந்த படமும் வெளியாகாத நிலையில், மிகப்பெரிய எதிர்பார்ப்பை ஏற்படுத்தியுள்ளது சூர்யாவின் கங்குவா. இந்த நிலையில், சூர்யா ரசிகர்களுக்கு பொங்கல் விருந்தாக கங்குவா படத்தின் போஸ்டர் வெளியாகியுள்ளது. இந்த படம் வரலாற்று படம் என்று கூறி வந்த நிலையில், யாரும் எதிர்பார்க்காத வகையில் நிகழ்காலத்து சூர்யாவின் கெட்டப் ஒன்றை படக்குழு வௌியிட்டுள்ளது. அதுவும் வில்லத்தனமான வித்தியாசமான கெட்டப்பில் சூர்யா உள்ளார்.

இப்படி, ஒரு பக்கம் திரையரங்குகள் நிரம்பி வழிய உச்சநட்சத்திரங்களின் படங்களின் அப்டேட்கள் அடுத்தடுத்து வெளியாகி இருப்பது ரசிகர்களை மகிழ்ச்சியில் ஆழ்த்தியுள்ளது.