உலகக் கோப்பை 2023 தொடருக்கான இறுதிப்போட்டிக்கு முதல் அணியாக அகமதாபாத்திற்குள் கால் எடுத்து வைத்துள்ளது இந்திய அணி. மும்பை வான்கடே மைதானத்தில் நேற்று நடந்த போட்டியில் இந்திய அணி நியூசிலாந்து அணியை 70 ரன்கள் வித்தியாசத்தில் வீழ்த்தியது.
மிரட்டிய ஷமி:
இந்திய அணியின் வெற்றிக்கு ரோகித்சர்மா, சுப்மன்கில் ஸ்ரேயாஸ் ஐயர் மற்றும் விராட் கோலி ஆகியோரின் அபாரமான பேட்டிங் காரணம் என்றால், பந்துவீச்சில் தனி ஆளாக அணியை வெற்றிக்கு நடத்திச் சென்ற பெருமை முகமது ஷமியையே சாரும். முகமது ஷமி தன்னுடைய அபாரமான பந்துவீச்சால் 7 விக்கெட்டுகளை வீழ்த்தி இந்தியாவை வெற்றி பெற வைத்தார் என்றே சொல்ல வேண்டும்.
இந்திய அணி நிர்ணயித்த இலக்கை நோக்கி ஆடிய நியூசிலாந்து அணிக்கு எதிராக பும்ரா தொடக்கத்தில் ஒயிடாக வீச, அடுத்து வந்த சிராஜூம் ஒயிட்களை வழங்க உடனடியாக ஷமியை பந்துவீச கொண்டு வந்தார் கேப்டன் ரோகித்சர்மா. முகமது ஷமி பந்துவீசினால் கண்டிப்பாக பலன் கிடைக்கும் என்ற ரோகித்சர்மாவின் கணிப்பு மிகவும் சரியாக அமைந்தது. ஏனென்றால் ஆபத்தான கான்வே மற்றும் இந்த தொடர் முழுவதும் அதிரடியால் மிரட்டிய ரவீந்திராவையும் அடுத்தடுத்த ஓவர்களில் முகமது ஷமி காலி செய்தார்.
காலியான நியூசிலாந்து:
அடுத்து ஜோடி சேர்ந்த கேப்டன் கனே வில்லியம்சன் மற்றும் டேரில் மிட்செல் நங்கூரம் போல பார்ட்னர்ஷிப் அமைத்தனர். அவர்களின் பேட்டிங்கால் 39 ரன்களில் 2 விக்கெட்டுகளை இழந்து தடுமாறிக் கொண்டிருந்த நியூசிலாந்து அணி 100 ரன்கள், 200 ரன்களை கடந்து சென்று கொண்டிருந்தது. ஜடேஜா, குல்தீப் யாதவ் என சுழலை பயன்படுத்தியும் ஆட்டத்தில் எந்த மாற்றமும் வரவில்லை. மீண்டும் ஷமியை கொண்டு வந்தார் கேப்டன் ரோகித்சர்மா.
ஷமியின் பந்துவீச்சில் அபாரமாக ஆடிக் கொண்டிருந்த வில்லியம்சன் 69 ரன்களுக்கு அவுட்டானார். அவர் ஆட்டமிழந்த அதே ஓவரில் டாம் லாதமையும் டக் அவுட்டாக்கினார். நியூசிலாந்தின் வலுவான முதல் 4 விக்கெட்டுகளையும் முகமது ஷமியே காலி செய்ய, மீண்டும் பார்ட்னர்ஷிப் அமைத்த பிலிப்ஸ் – மிட்செல் ஜோடியை பும்ரா பிரித்தார். கடைசியில் இந்திய அணிக்கு தொடக்கம் முதலே ஆபத்தாக இருந்த டேரில் மிட்செலையும் முகமது ஷமி அவுட்டாக்க இந்திய வீரர்கள் நிம்மதி அடைந்தனர்.
7 விக்கெட்டுகள்:
இந்த போட்டியில் சவுதி, பெர்குசன் ஆகியோரையும் அவுட்டாக்கி ஆட்டத்தை சுபமாக முடித்து வைத்தார் முகமது ஷமி. மொத்தம் 7 விக்கெட்டுகளை வீழ்த்தி முகமது ஷமி மிரட்டலாக பந்துவீசினார். கான்வே, ரவீந்திரா, வில்லியம்சன், மிட்செல், டாம் லாதம் என அவர் அவுட்டாக்கிய 7 பேர்களில் இந்த 5 பேர் ஆட்டத்தையே மாற்றக்கூடியவர்கள்.
இத்தனை சாதைனைகளா?
இது மட்டுமின்றி ஒரே உலகக்கோப்பையில் 3 முறை 5 விக்கெட்டுகளை கைப்பற்றிய வீரர் என்ற மகத்தான சாதனையையும் முகமது ஷமி படைத்துள்ளார். மேலும், ஒருநாள் உலகக்கோப்பையில் 4 முறை 5 விக்கெட்டுகள் மற்றும் அதற்கு மேல் கைப்பற்றிய வீரர் என்ற மகத்தான சாதனையை படைத்துள்ளார். உலகக்கோப்பை தொடரில் வேறு எந்த இந்திய வீரரும் 2 முறை கூட 5 விக்கெட்டுகளை கைப்பற்றியதில்லை. ஆனால், முகமது ஷமி 4 முறை 5 விக்கெட்டுகளை கைப்பற்றி மிரட்டியுள்ளார்.
சர்வதேச அளவிலும் ஒருநாள் உலகக்கோப்பை கிரிக்கெட் போட்டிகளில் எந்த வீரரும் 4 முறை 5 விக்கெட்டுகளை கைப்பற்றியதில்லை. இந்தியாவிற்காக ஒருநாள் உலகக்கோப்பை போட்டியில் 7 விக்கெட்டுகளை கைப்பற்றிய முதல் வீரர் என்ற சாதனையையும் முகமது ஷமி படைத்துள்ளார்.
மேலும், உலகக்கோப்பை கிரிக்கெட் போட்டிகளில் ஒரே போட்டியில் 7 விக்கெட்டை வீழ்த்திய 5வது வீரர் என்ற மகத்தான சாதனையையும் படைத்துள்ளார். இதற்கு முன்பு 1983ம் ஆண்டு வின்ஸ்டன் டேவிஸ், 2003ம் ஆண்டு கிளென் மெக்ராத், 2003ம் ஆண்டு ஆண்டி பைசெல், 2015ம் ஆண்டு டிம் சவுதி, தற்போது முகமது ஷமி படைத்துள்ளனர்.
