எல்லை மீறும் கன்னட அமைப்புகள்.. இப்படியா செய்வது?

தமிழ்நாட்டிற்கும் கர்நாடகத்திற்கும் இடையேயான காவிரி நதிநீர் பங்கீடு விவகாரத்தில் பல ஆண்டுகளாக இரு மாநிலத்திற்கும் இடையே பிரச்சினை நீடித்து வருகிறது. இந்த சூழலில், காவிரியில் இருந்து தமிழ்நாட்டிற்கு விநாடிக்கு 5 ஆயிரம் கன அடி நீர் திறந்து விட்டதை கண்டித்தும், தமிழ்நாட்டிற்கு தற்போது விநாடிக்கு 3 ஆயிரம் கன அடி நீர் திறந்து விடுவதை கண்டித்தும் அந்த மாநிலத்தில் இன்று பந்த் நடக்கிறது.

எல்லை மீறும் கன்னட அமைப்புகள்

காவிரி விவகாரத்தில் சில கன்னட அமைப்புகளும், அங்குள்ள சில கட்சியினரும் மனிதநேயமற்ற முறையிலும், வீண் பதற்றத்தை ஏற்படுத்தும் வகையிலும் நடைபெறுவது அவ்வப்போது அரங்கேறி வருகிறது. குறிப்பாக, அங்கு வசிக்கும் தமிழ்நாட்டைச் சேர்ந்தவர்கள் மீதும், அங்குள்ள தமிழர்கள் மீதும் தொடுக்கப்படும் தாக்குதலானது மிகவும் மோசமானதாக உள்ளது.

இந்த சூழலில், கடந்த சில தினங்களுக்கு முன்பு தமிழ்நாடு முதலமைச்சர் மு.க.ஸ்டாலினின் புகைப்படத்திற்கு மாலையிட்டு அந்த படத்தின் மீது இறுதிச்சடங்கு செய்து கன்னட அமைப்புகள் செய்த போராட்டம் தமிழர்கள் மத்தியில் பெரும் அதிர்ச்சியை ஏற்படுத்தியது. இந்த செயல் தமிழ்நாட்டில் பெரும் கொந்தளிப்பை ஏற்படுத்தியது. இந்த செயலுக்கு எதிர்க்கட்சிகள் உள்பட பல கட்சியினரும் கண்டனம் தெரிவித்தனர்.

நதிநீர் பங்கீடு

இந்த நிலையில், நேற்று சித்தா திரைப்பட நிகழ்ச்சிக்காக பெங்களூர் சென்ற சித்தார்த்திடம் மேடை அருகே சென்று கன்னட அமைப்பினர் வாக்குவாதத்தில் ஈடுபட்டனர். இதனால், சித்தார்த் விழா மேடையில் இருந்து பாதியிலே வெளியேறினார். கடந்த சில ஆண்டுகளுக்கு முன்பு தமிழ்நாட்டில் இருந்து பெங்களூர் உள்பட கர்நாடகா செல்லும் தமிழ்நாட்டு வாகனங்களை தாக்குவதும், தமிழ் ஓட்டுனர்களை தாக்கும் மிருகத்தனமான சம்பவங்களும் அரங்கேறியுள்ளது.

நதிநீர் பங்கீடு என்பது இரு மாநில விவசாயத்தின் தேவைக்காகவே நடைபெறுகிறது. இதை ஒரு இனக்கலவரமாக, மொழிக்கலவரமாக மாற்ற சில விஷமிகள் முயற்சிப்பதால் இரு மாநிலத்தின் அமைதியும் மிகவும் மோசமாக பாதிக்கப்படுகிறது. இனியாவது மனிதநேயமற்ற வகையில், மிருகத்தனமான வகையில் நடப்பதை சில கன்னட அமைப்புகள் தவிர்க்க வேண்டும். இதை அந்த மாநில அரசு உறுதி செய்ய வேண்டும்.

தங்களது கோரிக்கைகளுக்காக போராடுவதில் எந்த தவறும் இல்லை. ஆனால், அடுத்தவர் மனம் புண்படும்படியும், தேவையற்ற பதற்றத்தை ஏற்படுத்தும் வகையில் நடந்து கொள்வதும் மிகவும் தவறான செயல் ஆகும்.