G.O.A.T: வித்தியாசமான முயற்சியில் விஜய்! குடும்ப ரசிகர்களை கவருமா G.O.A.T?

கடந்த 2 நாட்களாக இணையத்தை ஆட்கொண்டு வருவது நடிகர் விஜய் என்றே சொல்லலாம். வெங்கட் பிரபு இயக்கத்தில் இவர் நடித்து வரும் படத்திற்கு யாருமே எதிர்பார்க்காத வகையில் தி கிரேட்டஸ்ட் ஆஃப் ஆல் டைம் என்ற பெயரை வைத்துள்ளனர்.

G.O.A.T.

தமிழ் படத்திற்கு அதுவும் உச்சநட்சத்திரம் அந்தஸ்து கொண்ட ஒரு நடிகரின் படத்திற்கு ஆங்கிலத்தில் பெயர் வைத்ததே அனைவருக்கும் ஆச்சரியமாகவும், அதிர்ச்சியாகவும் இருந்து வருகிறது. விஜய்க்கு முற்றிலும் பரீட்சயம் இல்லாததும், தமிழ் சினிமாவிற்கு பெரிதும் பழக்கப்படாத காலப்பயணம் எனப்படும் டைம் டிராவல் கதைப்பின்னணியில் உருவாகியுள்ள இந்த படம் ஒரு வித்தியாசமான முயற்சி என்றே கூறலாம்.

இந்த சூழலில், இந்த படம் ஹாலிவுட்டில் வெளியான ஜெமினி மேன் படத்தின் தழுவல் என்று சிலர் கூறுகின்றனர். வில் ஸ்மித் நடிப்பில் வெளியான ஜெமினி மேன் படத்தில் அவர் வயதான மற்றும் இள வயது தோற்றத்தில் நடித்திருப்பார். இந்த படத்தின் போஸ்டரும் அப்படியே உள்ளது. அதில் ஒரு விஜய் நமக்கு பரீட்சயமானவராகவும், மற்றொரு விஜய் இள வயதிலும் உள்ளனர்.

ரசிகர்களை கவருமா?

வெங்கட்பிரபுவின் வழக்கமான காமெடியுடன் இந்த வித்தியாசமான கதைக்களம் அமைவதால் படம் பட்டிதொட்டியெங்கும் சென்று சேரும் ப்ளாக்பஸ்டர் ஆகுமா? அல்லது மக்களுக்கு அந்தளவு பழக்கம் இல்லாத கதைக்களம் என்பதால் ரசிகர்களை ஏமாற்றி விடுமா? என்று கேள்வி எழும்பியுள்ளது. நடிகர் விஜய்யின் மிகப்பெரிய பலமே அவரது குடும்ப ரசிகர்கள். வாரிசு படம் அவரது இளைய ரசிகர்களை பெரியளவில் கவராவிட்டாலும், குடும்ப ரசிகர்களை கவர்ந்தது. இந்த படத்தின் வித்தியாசமான கதைக்களம் குடும்ப ரசிகர்களை கவர்ந்திழுக்குமா? என்ற கேள்வி எழுந்துள்ளது.

ரசிஇதுமட்டுமின்றி, சமீபகாலமாக விஜய் படங்களின் பெயர்கள் தமிழில் வைக்கப்படுவது முற்றிலும் குறைந்து வருகிறது. இது அவரது ரசிகர்களுக்கே வருத்தத்தை ஏற்படுத்தியுள்ளது. 2017ம் ஆண்டு முதல் அவர் நடித்த படங்களில் வாரிசு மட்டுமே தமிழ் பெயர். லியோ என்பது ஒரு நபரை குறிப்பிடும் பெயர். இந்த இரண்டு படங்கள் பெயர்கள் தவிர தமிழ் பெயரே இல்லாத மெர்சல், சர்கார், பிகில், மாஸ்டர், பீஸ்ட் என மற்ற மொழிகளின் பெயர்களிலே படங்களுக்கு தலைப்புகள் வைக்கப்பட்டு வருகிறது. அரசியலுக்கு வரும் சூழலில், நடிகர் விஜய் இதுபோன்ற வித்தியாசமான கதைக்களத்தில் நடித்திருப்பது எந்தளவு கை கொடுக்கும் என்ற கேள்வியும் எழுந்துள்ளது.