தளபதி நீங்களே இப்படி பண்ணலாமா? குழந்தைங்க இருக்காங்க!

தமிழ் திரையுலகின் தவிர்க்க முடியாத நடிகராக உலா வருபவர் நடிகர் விஜய். கோடிக்கணக்கான ரசிகர்களை கொண்ட நடிகர் விஜய்யின் லியோ திரைப்படத்தின் ட்ரெயிலர் ரிலீசாகியது. லோகேஷ் கனகராஜின் திரைப்படமாக இந்த படம் வந்துள்ளது என்பதை ட்ரெயிலர் நிரூபித்துள்ளது.

கெட்ட வார்த்தை பேசும் விஜய்:

ஆனால், ட்ரெயிலரில் நடிகர் விஜய் கெட்ட வார்த்தை பேசும் காட்சி விஜய் ரசிகர்களுக்கே மிகப்பெரிய அதிர்ச்சியை ஏற்படுத்தியுள்ளது. ஏனென்றால், தமிழ்நாட்டில் அதிகளவில் குழந்தை ரசிகர்களை கொண்ட நடிகராக உலா வருபவர் நடிகர் விஜய். ரஜினிகாந்திற்கு இணையாக குடும்பம், குடும்பமாக ரசிகர்கள் திரையரங்குகளுக்கு வந்து பார்க்கும் படமாகவும் விஜய் படங்கள் இருந்து வருகிறது.

இந்த சூழலில், நடிகர் விஜய் லியோ திரைப்படத்தில் கெட்ட வார்த்தை பேசும் காட்சி அவரது குடும்ப ரசிகர்களையும், குழந்தை ரசிகர்களுக்கும் அதிர்ச்சியான ஒன்றாகவே உள்ளது. குறிப்பாக, குழந்தைகள் கொண்டாடும் நடிகரான விஜய் இதுபோன்று பேசுவது அவரை ரசிக்கும் குழந்தைகளை தவறான வழியில் வழிநடத்துவது போல அமைவதாக பலரும் கருத்து தெரிவித்துள்ளனர்.

சமூக அக்கறை வேண்டும்

அரசியல் களத்திற்கு அச்சாரமிட்டு வரும் விஜய் தனது மக்கள் இயக்கம் மூலமாக நற்பணிகளை விறுவிறுப்பாக செய்து வரும் சூழலில், தற்போது இதுபோன்ற வசனங்களை பேசுவது தேவையற்ற சர்ச்சைகளை ஏற்படுத்தியுள்ளது. இதனால், கண்டிப்பாக தியேட்டருக்கு வரும்போது லியோ படத்தில் இந்த வசனம் இடம்பெறாது என்றே எதிர்பார்க்கப்படுகிறது.

தமிழ்நாட்டைப் பொறுத்தவரை திரைப்படங்கள் இளைஞர்கள் வாழ்க்கையோடு கலந்த ஒன்றாக மாறிவிட்ட சூழலில், திரைப்படங்களில் இதுபோன்ற ஆபாச வார்த்தைகளை அடிக்கடி பயன்படுத்துவது தவறான முன்னுதாரணமாக மாறி வருகிறது. இயக்குனர்கள் வெறும் வர்த்தக கண்ணோட்டமாக மட்டுமின்றி, சமூக அக்கறையுடனும் திரைப்படங்களை இயக்க வேண்டும் என்பது அவசியம் என்றே சமூக ஆர்வலர்களும், பொதுமக்களும் தெரிவித்து வருகின்றனர்.