ஜெய்ஸ்வால் சதம்.. ரிங்குசிங் காட்டடி! அரையிறுதிக்கு முன்னேறிய இந்தியா..!

ஆசிய விளையாட்டுப் போட்டிகள் சீனாவில் நடைபெற்று வருகிறது. இதில் ருதுராஜ் கெய்க்வாட் தலைமையிலான இந்திய அணி இன்று காலிறுதியில் நேபாள அணியை எதிர்கொண்டது. டாஸ் வென்ற இந்தியா முதலில் பேட்டிங்கைத் தேர்வு செய்தது.
இதன்படி, ஆட்டத்தை தொடங்கிய இந்திய அணிக்கு ஜெய்ஸ்வால் – ருதுராஜ் கெய்க்வாட் சிறப்பான தொடக்கம் அளித்தனர். குறிப்பாக, ஜெய்ஸ்வால் இந்திய அணியின் வருங்கால தொடக்கம் நான்தான் என்பது போல ஆடினார். பந்துகளை பவுண்டரிக்கும், சிக்ஸருக்கும் விளாசினார். மறுமுனையில் ருதுராஜ் அவருக்கு ஒத்துழைப்பு அளித்தார்.

ஜெய்ஸ்வால் சதம்:

அரைசதம் கடந்தும் ஜெய்ஸ்வால் ருத்ரதாண்டவம் ஆடினார். 9.5 ஓவர்களில் 103 ரன்கள் இந்தியா எட்டியபோது கேப்டன் ருதுராஜ் 25 ரன்களில் அவுட்டானார். பின்பு வந்த திலக் வர்மா 2 ரன்களிலும், ஜிதேஷ் சர்மா 5 ரன்களில் அவுட்டானார்கள். ஆனாலும், தனி ஆளாக வெளுத்து வாங்கிய ஜெய்ஸ்வால் சதம் விளாசினார். பின்னர், 49 பந்துகளில் 8 பவுண்டரி 7 சிக்ஸருடன் 100 ரன்களை எட்டியபோது அவர் அவுட்டானார். அப்போது இந்தியாவின் மொத்த ஸ்கோரே 150 ரன்களாக இருந்தது.
கடைசியில் ஷிவம் துபே – ரிங்குசிங் ஜோடி சேர்ந்தனர். இந்தியாவின் நம்பிக்கையான ஃபினிஷர் என்ற அவதாரம் எடுத்துள்ள ரிங்குசிங் சிக்ஸர் மழை பொழிந்தார்.

ரிங்கு சிங் காட்டடி:

ஷிவம் துபேவும் அதிரடி காட்ட இந்தியா ஸ்கோர் கடைசி கட்டத்தில் எகிறியது. கடைசியில் 20 ஓவர்கள் இழப்பிற்கு இந்தியா 4 விக்கெட்டுகளை இழந்து 202 ரன்களை எடுத்தது.
ஷிவம் துபே 19 பந்துகளில் 2 பவுண்டரி 1 சிக்ஸருடன் 25 ரன்களுடனும், ரிங்குசிங் 15 பந்துகளில் 2 பவுண்டரி 4 சிக்ஸருடன் 37 ரன்களும் எடுத்து களத்தில் இருந்தனர்.
203 ரன்கள் என்ற கடின இலக்குடன் களமிறங்கிய நேபாள அணியின் தொடக்க வீரர் ஆசீப் ஷேக் 10 ரன்களில் அவுட்டாக, குஷல் பர்டேல் – குஷல் மல்லா நிதானமாக ஆடினர்.

இந்தியா வெற்றி:

நிதானமாக ஆடிய குஷல் பர்டேல் 28 ரன்களில் அவுட்டாக, குஷல் மல்லாவும் 29 ரன்களில் அவுட்டானார். அடுத்து வந்த கேப்டன் ரோகித் 3 ரன்களில் அவுட்டானார். 77 ரன்களுக்கு 4 விக்கெட்டுகளை இழந்த நேபாள அணிக்காக தீபேந்திரசிங் – சுந்தீப் ஜோடி சேர்ந்தனர். இருவரும் சிக்ஸர்களாக விளாசினர். இருவரும் இணைந்து 7 சிக்ஸர்கள் அடித்தனர். 122 ரன்களை எட்டியேபாது 15 பந்துகளில் 4 சிக்ஸர்களை விளாசி 32 ரன்கள் எடுத்த தீபேந்திரா அவுட்டானார். அடுத்த சில நிமிடங்களில் 12 பந்துகளில் 1 பவுண்டரி 3 சிக்ஸர்கள் விளாசி 29 ரன்கள் எடுத்த சுந்தீப்பும் அவுட்டானார்.

கடைசியில் நேபாள அணி 20 ஓவர்களில் 9 விக்கெட் இழப்பிற்கு 179 ரன் மட்டுமே எடுத்தது. இதனால், இந்தியா 23 ரன்கள் வித்தியாசத்தில் வெற்றி பெற்று அரையிறுதிக்கு முன்னேறியது.