தொடரை வெல்லுமா இந்தியா? வெற்றி பெறுமா ஆஸ்திரேலியா?

உலகக்கோப்பைக்கு முன்பாக இந்திய அணி ஆஸ்திரேலிய அணியுடன் ஒருநாள் தொடரில் ஆடி வருகிறது. 3 போட்டிகள் கொண்ட தொடரின் முதல் போட்டியில் ஆஸ்திரேலிய அணியை 5 விக்கெட் வித்தியாசத்தில் இந்தியா வீழ்த்தியது. கே.எல்.ராகுல் தலைமையில் களமிறங்கிய இந்திய அணியில் ருதுராஜ் கெய்க்வாட், சுப்மன்கில், கே.எல்.ராகுல், சூர்யகுமார் யாதவ் ஆகியோர் சிறப்பாக ஆடினர்.

இந்தியா – ஆஸ்திரேலியா:

இந்த நிலையில், இரு அணிகளும் மோதும் 2வது ஒருநாள் போட்டி இன்று இந்தூரில் உஉள்ள ஹோல்கர் கிரிக்கெட் மைதானத்தில் நடைபெற உள்ளது. இந்திய நேரப்படி 1.30 மணி தொடங்கும் இந்த போட்டியில் கடந்த போட்டியில் களமிறங்கிய இந்திய அணி களமிறங்கும் என்று எதிர்பார்க்கப்படுகிறது.

ஆஸ்திரேலிய அணியை பொறுத்தவரையில் கடந்த போட்டியில் ஸ்மித், லபுஷேனே, வார்னர், கிரீன் ஆகியோர் ஓரளவு நன்றாக ஆடினர். இன்றைய போட்டியில் அவர்கள் மேலும் சிறப்பான ஆட்டத்தை வெளிப்படுத்தினால் அவர்கள் இந்திய அணிக்கு சவால் அளிக்க முடியும். இந்திய அணிக்கு மிகப்பெரிய பலமாக கடந்த போட்டியில் அமைந்தது முகமது ஷமியின் பந்துவீச்சே ஆகும்.

தொடரை வெல்லுமா இந்தியா?

உலகக்கோப்பை தொடருக்கான அணியில் முகமது ஷமி தேர்வு செய்யப்பட்டாலும், ஆடும் லெவனில் அவருக்கு பதிலாக ஷர்துல் தாக்கூர் களமிறக்கப்படுவது விமர்சனத்தை ஏற்படுத்தி வருகிறது. தான் கண்டிப்பாக தேவை என்பதை உணர வைக்கும் விதமாக கடந்த போட்டியில் 5 விக்கெட்டுகளை முகமது ஷமி வீழ்த்தினார். இன்றைய போட்டியிலும் அவர் தனது பந்துவீச்சு தாக்குதலை நடத்துவார் என்று எதிர்பார்க்கலாம்.

இன்றைய போட்டியில் வெற்றி பெற்று தொடரை கைப்பற்ற இந்திய அணி முழு முயற்சியுடன் இறங்கும். அதேசமயம் தொடரை இழந்து விடக்கூடாது என்பதால் ஆஸ்திரேலிய அணியும் முழு உத்வேகத்துடன் ஆடும். தொடரை இந்தியா வெல்லுமா? அல்லது தொடரில் ஆஸ்திரேலியா நீடிக்குமா? என்பதை தீர்மானிக்கும் இந்த போட்டி ரசிகர்களுக்கு நிச்சயம் விருந்தாக அமையும்.